ಒಸಗೆ(ಗಜಲ್)

ತಿಳಿಆಕಾಶದ ಬೆಳ್ಳನೆ ಚಂದ್ರಮ
ನಿನ್ನ ನಗೆಯ ಹಾಗೆ
ತೆಳು ಮೇಲುದ ಸವಿಸೊಬಗಿನ ನೇವರ
ಈ ತಂಗಾಳಿ ನಡಿಗೆ

ಸಂಧ್ಯಾಕಾಶದ ಕೆಂಪು ಭಿತ್ತಿಯಲಿ
ಬೆಳ್ಳಿ ಮೂಡಿದ ಹಾಗೆ
ನಿನ್ನಾಗಮನವು ನನ್ನ ಬದುಕಿನಲಿ
ಜೀವಜ್ಯೋತಿ ಬೆಳಗೆ

ಎಲ್ಲಿ ಮಿಂಚಿದರೂ ವಿದ್ಯುಲ್ಲತೆಯದು
ನಿನ್ನ ನೆನಪೆ ನನಗೆ
ಕಣ್ಣ ಮುಚ್ಚಿದರೂ ಕಂಪು ತೀಡಿದರೆ
ತುಂಬುವೆ ನೀನೆ ಎದೆಗೆ

ಬಳಕುವ ಬಳ್ಳಿಗೆ ಅರಳಿದ ಹೂವಿಗೆ
ಉಪಮೆ ನಿನ್ನಸೊಬಗೆ
ಮಧುಕಲಕಂಠದ ಕೋಗಿಲೆ ಇಂಪಿಗೆ
ನಮ್ಮಬೇಟವೆ ಒಸಗೆ

-ಜೈಕುಮಾರ್ ಮರಿಯಪ್ಪ

ನಾಗಜಡೆ

ಈ ನಾಗಜಡೆಯ ಹೆಡೆಯಲ್ಲಿ
ಎಂಥ ಸೊಗಸಾದ ಮೊಗವು ಚಲುವೆ!
ಕೇದಿಗೆಯ ಹೊಡೆಯ ನಸು ಹೊಗರ ಹೊತ್ತ
ಚೌದಿಗೆಯ ಚಂದ್ರ ಒಲವೆ.

ನಿನ್ನ ಕೆನ್ನೆಗುಳಿಯಸುಳಿಯಲ್ಲಿ ಸಣ್ಣ
ಮೀನಾಗುವಾಸೆ ನನಗೆ.
ನಸುಬಿರಿದ ತುಟಿಯ ಸುಲಿಪಲ್ಲ ಮೆರಗ
ಸೆರೆಹಿಡಿಯುವಾಸೆ ಎನಗೆ.

ಪೆರೆನೊಸಲ ಮೇಲೆ ಕರಿತಿಲಕವಾಗಿ
ಮನಗೊಳ್ವ ಆಸೆ ನನಗೆ.
ನಿಡಿಗುರುಳ ಹೆರಳ ನಡುವಲ್ಲಿ
ಸಣ್ಣ ಹೂವಾಗುವಾಸೆ ಎನಗೆ.

ಹೊಂಗಿರಣ ರೇಖೆ ಪ್ರತಿಫಲಿಪ
ಕೆನ್ನೆ ಬೆಳಗಲ್ಲೇ ಕರಗುವಾಸೆ.
ಮುತ್ತಿಟ್ಟ ನತ್ತು ಮಿನುಮಿನುಗೆ ನಗುವ
ಕಿಲಕಿಲಕೆ ಕುಣಿವ ಆಸೆ.

ನಕ್ಷತ್ರ ಹೊಳಪಸೆರೆಹಿಡಿದ
ಕಣ್ಣ ಬೆಳಕಾಗುವಾಸೆ ಎನಗೆ
ಎದೆ ಹೊರೆಯದುಗುಡ ಸರಿಸಾಚೆಗತ್ತ
ಜೀಹಾಸೆ ನೀನೆ ಎನಗೆ
-ಜೈಕುಮಾರ್ ಮರಿಯಪ್ಪ